Ыйман негиздери, Имам Азам Абу Ханифа

Бул Абу Ханифа, же Имам Азам (рахимахуллаху алейхи) деген аттар менен танылган улуу аалымдын калемине таандык «Ал-Фыкху ал-Акбар» аттуу китептин кыргызча котормосу. «Ыйман негиздери» китеби акыйда илиминин өзөгү. Өсүп чыккан түпкү тамыры. Урук байлаган данеги. Пайгамбарыбыз көз жумуп, мен мен деген сахабалар наркы дүйнөгө көчүп, Ислам ааламы жетимсиреп турганда, эл карайлап Ыйман, Ислам, ишеним маселелери кыйшайып ооп баратканда, абалды таасын байкаган айтылуу аалым Абу Ханифа Куран менен Сүннөткө таянуу менен ушул эмгегин жазып, ишеним, ыйман маселесин нары бери ообой турган туруктуу нукка салган. Ошол күндөн ушул күн бүткүл аалымдар бул китепти чечмелеп, иликтеп жиликтеп түшүнүп, жалпы элге түшүндүрүп, айтор ыйман, акыйда, ишеним негиздерин ушул китептин нускоосу менен улантып келет.